313496
ມື້ນີ້
ມື້ວານນີ້
ອາ​ທິດ​ນີ້
ອາ​ທິດ​ທີ່​ແລ້ວ
ເດືອນ​ນີ້
ເດືອນທີ່ຜ່ານມາ
ວັນທັງຫມົດ
88
175
2062
309153
7361
8085
313496
Your IP: 34.228.55.57
2019-03-23 10:41

     DSC 0172

ສກຂ ສາລະວັນ

ສະຫຼຸບການຈັດຕັ້ງປະຕິບັດວຽກງານການສຶກສານອກໂຮງຮຽນ ສົກຮຽນ 2017 – 2018

ແລະ ທິດທາງແຜນການ ສົກຮຽນ 2018 – 2019

            ໃນຕອນເຊົ້າວັນທີ 29 ພະຈິກນີ້ ທີ່ຫ້ອງປະຊຸມພະແນກສຶກສາທິການ ແລະ ກິລາແຂວງ ສາລະວັນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດແຜນພັດທະນາການສຶກສານອກໂຮງຮຽນສົກຮຽນ 2017 -2018 ແລະ ທິດທາງແຜນການພັດທະນາ ສົກຮຽນ 2018-2019 ໂດຍພາຍໃຕ້ການເປັນປະທານຂອງທ່ານ ສີລິສັກ ຖະໜອມຮັກ ກຳມະການພັກແຂວງ ຫົວໜ້າພະແນກສຶກສາທິການ ແລະ ກິລາແຂວງ, ມີທ່ານ ແອປີຊານ ລານນາຂວາງ ຫົວໜ້າຂະແໜງນອກໂຮງຮຽນ, ທ່ານຫົວໜ້າ, ຮອງຫົວໜ້າຫ້ອງການສຶກສາທິການ ແລະ ກິລາ ພ້ອມດ້ວຍຫົວໜ້າໜ່ວຍງານການສຶກສານອກໂຮງຮຽນ 8 ເມືອງ, ຜູ້ອຳນວຍການສູນການສຶກສານອກໂຮງຮຽນ ເຂົ້າຮ່ວມຢ່າງພ້ອມພຽງ.

            ໃນພິທີ ທ່ານ ແອປີຊານ ລ້ານນາຂວາງ ຫົວໜ້າຂະແໜງນອກໂຮງຮຽນ ກໍ່ໄດ້ໃຫ້ກຽດຜ່ານບົດສະຫຼຸບການຈັດຕັ້ງປະຕິບັດແຜນພັດທະນາການສຶກສານອກໂຮງຮຽນ ແລະ ທິດທາງແຜນການໃນຕໍ່ໜ້າ ເຊິ່ງທ່ານກໍ່ໄດ້ເນັ້ນໜັກບາງດ້ານທີ່ສຳຄັນເປັນຕົ້ນແມ່ນການເອົາໃຈໃສ່ລົງທຶນເຂົ້າໃນການພັດທະນາການສຶກສານອກໂຮງຮຽນ ເລີ່ມແຕ່ການລຶບລ້າງຄວາມບໍ່ຮູ້ໜັງສື, ບຳລຸງຍົກລະດັບຊັ້ນປະຖົມ ຈົນຮອດຊັ້ນມັດທະຍົມສຶກສາ ແລະ ການຝຶກອົບຮົມວິຊາຊີບຂັ້ນພື້ນຖານໂດຍເນັ້ນໃສ່ການສະໜອງອຸປະກອນຮັບໃຊ້ການຮຽນ - ການສອນ, ອົບຮົມ ແລະ ຍົກລະດັບຄູ ລວມທັງການສ້າງຄວາມເຂັ້ມໃຫ້ແກ່ວຽກງານການບໍລິຫານ ແລະ ຄຸ້ມຄອງການສຶກສາໃຫ້ແກ່ຜູ້ບໍລິຫານການສຶກສາໃນແຕ່ລະຂັ້ນ, ນອກຈາກນັ້ນ ຍັງໄດ້ເຜີຍແຜ່ນະໂຍບາຍການສຶກສານອກໂຮງຮຽນບັນດານິຕິກຳຕ່າງໆ ແລະ ນຳໃຊ້ກົດໜາຍການສຶກສາສະບັບປັບປຸງ, ສັງລວມນິຕິກຳຫຼາຍຢ່າງເພື່ອຮັບໃຊ້ໃຫ້ແກ່ການພັດທະນາລະບົບການສຶກສານອກໂຮງຮຽນ. ວຽກລົບລ້າງຄວາມບໍ່ຮູ້ໜັງສື ບໍາລຸງຍົກລະດັບການສຶກສາຊັ້ນປະຖົມ ແລະ ຊັ້ນມັດທະຍົມ ແມ່ນໄດ້ບັນລຸຕາມເປົ້າໜາຍສະຫັດສະວັດດ້ານການພັດທະນາ ໂດຍສະເພາະແມ່ນຜົນສຳເລັດໃນການປະກາດຈົບຊັ້ນປະຖົມສຶກສາບຳລຸງທົ່ວແຂວງ ໃນປີ 2014 ແລ້ວສືບຕໍ່ບໍາລຸງຍົກລະດັບການສຶກສາຊັ້ນມັດທະຍົມຕອນຕົ້ນ ໃຫ້ແກ່ປະຊາຊົນບັນດາເຜົ່າ ເຊິ່ງປະຊາຊົນໃນກຸ່ມເປົ້າໜາຍ ອາຍຸ 15-35 ປີ ທີ່ຈົບມາຈາກຊັ້ນປະຖົມສຶກສາບຳລຸງ ແລະ ປະຊາຊົນທົ່ວໄປມີຜູ້ຮຽນຊັ້ນມັດທະຍົມຕອນຕົ້ນບຳລຸງ ມີທັງໜົດ 2,287 ຄົນ ຍິງ 944 ຄົນ, ມີຜູ້ຮຽນຈົບຊນມັດທະຍົມຕອນຕົ້ນ 1,023 ຄົນ, ຍິງ 394 ຄົນ, ມີຄູສອນ 530 ຄົນ, ຍິງ 181 ຄົນ, ຈຳນວນຜູ້ຮຽນຈົບຊັ້ນມັດທະຍົມສຶກສາຕອນປາຍບຳລຸງ ມີ 62 ຄົນ ຍິງ 18 ຄົນ, ປະກາດເມືອງເປັນເມືອງຈົບຊັ້ນມັດທະຍົມຕອນຕົ້ນບຳລຸງໄດ້ 8 ເມືອງຄື: ເມືອງ ລະຄອນເພັງ, ຄົງເຊໂດນ, ວາປີ, ເລົ່າງາມ, ສາລະວັນ, ຕຸ້ມລານ, ສະໜ້ວຍ ແລະ ຕະໂອ້ຍ, ວຽກງານອົບຮົມວິຊາຊີບຂັ້ນພື້ນຖານ ແມ່ນໄດ້ຍົກລະດັບການສຶກສາ ແລະ ມີວິຊາຊີບ ເຊິ່ງໄດ້ປະກອບສ່ວນເຂົ້າໃນການລຶບລ້າງຄວາມທຸກຍາກໃຫ້ປະຊາຊົນ ຈັດການຮຽນ-ການສອນໃນທຸກຊັ້ນຂອງການສຶກສານອກໂຮງຮຽນ ໄດ້ນຳເອົາວິຊາຊີບເຂົ້າສິດສອນຄວບຄູ່ກັນໄປ, ໂດຍສະເພາະການອົບຮົມວິຊາຊີບຂັ້ນພື້ນຖານຕັດຫຍິບ ຄວບຄູ່ກັບການຮຽນຮູ້ໜັງສື ຈຳນວນ 42 ຄົນ, ຈັດການອົບຮົມວິຊາຊີບແບບເຄື່ອນທີ່ຮ່ວມກັບສະມາຄົມພັດທະນາຊຸມຊົນບ້ານເຮົາເປັນຕົ້ນແມ່ນ ຖັກກ້ານຟອຍແຂມ, ອົບຮົມການແຕ່ງກິນ ເພື່ອເປັນການພັດທະນາຊີວິດການເປັນຢູ່ຂອງປະຊາຊົນ ແລະ ເຮັດໃຫ້ເຂົາເຈົ້າຮູ້ນຳໃຊ້ໃຫ້ເປັນປະໂຫຍດ, ສຳລັບທິດທາງແຜນການ ພັດທະນາການສຶກສານອກໂຮງຮຽນແມ່ນສືບຕໍ່ລົບລ້າງຄວາມບໍ່ຮູ້ໜັງສື ແລະ ບໍາລຸງຍົກລະດັບຊັ້ນປະຖົມສຶກສາໃຫ້ຊາວໜຸ່ມ ແລະ ຜູ້ໃຫຍ່ ໃນເກນອາຍຸ 15 – 40 ປີ ຜູ້ທີ່ດ້ວຍໂອກາດ, ຂາດໂອກາດການສຶກສາໃນໂຮງຮຽນເຂດຫ່າງໄກສອກຫຼີ ຜູ້ທີ່ຕົກຫຼົ່ນຈາກໃນໂຮງຮຽນ ໃຫ້ໄດ້ຮຽນສາຍການສຶກສານອກໂຮງຮຽນ, ແລະ ບຳລຸງຍົກລະດັບການສຶກສາຊັ້ນມັດທະຍົມຕອນຕົ້ນໃຫ້ແກ່ກຸ່ມເປົ້າໜາຍອາຍຸ 15 – 35 ປີ, ຝຶກອົບຮົມວິຊາຊີບຂັ້ນພື້ນຖານຄວບຄູ່ກັບການຍົກລະດັບການສຶກສາ ແລະ ເຂດທີ່ມີເງື່ອນໄຂ ພ້ອມທັງຮ່ວມມືກັບບັນດາອົງການຈັດຕັ້ງສາກົນ, ຕ່າງປະເທດ ແລະ ອົງການທີ່ບໍ່ຂຶ້ນກັບລັດຖະບານ ເພື່ອຍາດແຍ່ງທຶນຮອນ, ອຸປະກອນການຮຽນ - ການສອນ, ເຄື່ອງກິລາກາຍຍະກຳ, ເຕັກນິກວິຊາການ ແລະ ພື້ນຖານໂຄງລ່າງ ໃນການພັດທະນາການສຶກສາໃຫ້ມີການຂະຫຍາຍຕົວຢ່າງຮອບດ້ານ.

 

ຂ່າວໂດຍ: ແຫຼງຄຳ ບຸດນາໂຄກ

ອັບໂຫຼດໂດຍ: ໂອເລ້ ສິງຂາວເພັດ