313527
ມື້ນີ້
ມື້ວານນີ້
ອາ​ທິດ​ນີ້
ອາ​ທິດ​ທີ່​ແລ້ວ
ເດືອນ​ນີ້
ເດືອນທີ່ຜ່ານມາ
ວັນທັງຫມົດ
119
175
2093
309153
7392
8085
313527
Your IP: 34.228.55.57
2019-03-23 10:48

DSC 0975

ສະຫະພັນຮາກ​ຖານ​ແມ່ຍິງ​ພະ​ແນ​ກ ສກຂ ສະຫຼຸບວຽກງານ 3 ດີ ປະຈຳປີ 2018

            ​ໃນ​ຕອນ​ເຊົ້າ​ວັນ​ທີ 25 ມັງກອນນີ້ ທີ່​ຫ້ອງ​ປະຊຸມ​ພະ​ແນ​ກສຶກສາ​ທິການ ​ແລະ ກິລາ​ແຂວງ ສາລະ​ວັນ ( ສກຂ ) ​ໄດ້​ຈັດ​ກອງ​ປະຊຸມສະຫຼຸບການຈັດຕັ້ງການປະຕິບັດເນື້ອໃນຂໍ້ແຂ່ງຂັນ 3 ດີ ປະຈຳປີ 2018 ແລະ ສືບຕໍ່ເປີດຂະບວນການແຂ່ງຂັນ 3 ດີ ປະຈຳປີ 2019 ຂອງສະຫະພັນ​ແມ່ຍິງ​ຮາກ​ຖານ ພະ​ແນ​ກສຶກສາ​ທິການ ​ແລະ ກິລາ, ​ໂດຍ​​ເປັນ​ກຽດ​ເຂົ້າ​ຮ່ວມ​ຂອງ​ ທ່ານ ນາງ ດວງ​ມາລາ ສີສະ​ໜຸດ ຮອງເລຂາໜ່ວຍພັກ ຮອງ​ປະທານ​ສະຫະພັນ​ແມ່ຍິງ​ແຂວງ, ທ່ານ ສຸນີ ນາມມະບົວລີ ຄະນະ​ພັກ​ ຄະນະ​ພະ​ແນ​ກສຶກສາ​ທິການ ​ແລະ ກິລາ​ແຂວງ, ທ່ານ ນາງ ຄຳຄ່ອງ ຈັນທະວົງສັກ ປະທານສະຫະພັນແມ່ຍິງຮາກຖານ​ພະ​ແນ​ກສຶກສາ​ທິການ ​ແລະ ກິລາ​ແຂວງ, ມີ​ບັນດາ​ສະຫະພັນ​ແມ່ຍິງກຸ່ມວັດທະນະທຳສັງຄົມ​, ຊາວຫ​ນຸ່ມ, ກຳມະບານ ພ້ອມ​ດ້ວຍ​ສະມາຊິກ​ແມ່ຍິງ ​ແລະ ​ແຂກ​ທີ່​ຖືກ​ເຊີນ​ເຂົ້າ​ຮ່ວມ.

            ​ໃນ​ພິທີ ທ່ານ ນາງ ບຸນນອງ ສອນນາລີ ຮອງປະທານສະຫະພັນແມ່ຍິງຮາກຖານພະແນກສຶກສາທິການ ແລະ ກິລາແຂວງ ກໍ່​ໄດ້​ໃນ​ກຽດ​ຂຶ້ນ​ຜ່ານ ​ບົດສະຫຼຸບການຈັດຕັ້ງປະຕິບັດເນື້ອໃນຂໍ້ແຂ່ງຂັນ 3 ດີປະຈໍາປີ 2018 ແລະ ສືບຕໍ່ເປີດຂະບວນການແຂ່ງຂັນ 3 ດີ ປະຈໍາປີ 2019 ເຊິ່ງທ່ານ​ໄດ້​ກ່າວ​ວ່າ: ການຈັດຕັ້ງປະຕິບັດຂໍ້ແຂ່ງຂັນ 3 ດີແມ່ນໄດ້ຜັນຂະຫຍາຍຂໍ້ແຂ່ງຂັນ 3 ດີໃຫ້ສອດຄ່ອງກັບສະພາບຄວາມເປັນຈິງຂອງຮາກຖານ, ເຊິ່ງໄດ້ປະຕິບັດຕາມ 4 ບາດກ້າວເປັນຕົ້ນແມ່ນ ການກະກຽມ ເຊິ່ງໄດ້ເກັບກຳສະພາບ ແລະ ສັງລວມຂໍ້ມູນກ່ຽວກັບສະມາຊິກສະຫະພັນແມ່ຍິງຂອງຕົນ ແລະ ສ້າງເປັນແຜນງານ, ໂຄງການ ເພື່ອຈັດຕັ້ງປະຕິບັດຂະບວນການຂໍ້ແຂ່ງຂັນ 3 ດີ, ບາດກ້າວທີ 2 ແມ່ນເປີດຂະບວນການແຂ່ງຂັນ 3 ດີ ໄດ້ກະກຽມເນື້ອໃນ ເອກະສານມູນເຊື້ອຂອງແມ່ຍິງລາວ, ກົດໜາຍພັດທະນາ ແລະ ປົກປ້ອງແມ່ຍິງ, ເອກະສານຕ່າງໆຂອງສະຫະພັນແມ່ຍິງ ແລະ ເອກະສານຂະແໜງການທີ່ກ່ຽວຂ້ອງມາເຜີຍແຜ່ໃຫ້ສະມາຊິກແມ່ຍິງຮັບຮູ້ແລະເຂົ້່າໃຈ, ບາດກ້າວທີ 3 ການຕິດຕາມ, ກວດກາ, ຊຸກຍູ້, ການຈັດຕັ້ງຂະບວນການແຂ່ງຂັນ 3 ດີ, ບາດກ້າວທີ 4 ແມ່ນການສະຫຼຸບຕີລາຄາ ແລະ ການຍ້ອງຍໍ ຜົນໄດ້ຮັບໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໂດຍສະເພາະແມ່ນ ພົນລະເມືອງດີ ເຫັນວ່າສະມາຊິກແມ່ຍິງມີຄຸນສົມບັດມິນທຳປະຕິວັດ, ມີນໍ້າໃຈຮັກຊາດ,ຮັກລະບອບປະຊາທິປະໄຕປະຊາຊົນ, ເຄົາລົບລະບຽບກົດໜາຍ, ຮັກສາມູນເຊື້ອທີ່ເປັນເອກະລັກຂອງແມ່ຍິງ ກວມເອົາ 100%, ພັດທະນາດີ ປະກອບດ້ວຍການພັດທະນາຕົນເອງ ແລະ ພັດທະນາການຈັດຕັ້ງ, ພັດທະນາປະເທດຊາດ ກວມເອົາ 100%, ສ້າງຄອບຄົວດີ ກວມເອົາ 100%. ໃນນັ້ນ ວຽກ​ງານ​ການ​ສຶກສາ​ອົບຮົມ​ການ​ເມືອງ​ແນວ​ຄິດ ​ແມ່ນ​ໄດ້​ປຸກລະດົມ​ໃຫ້​ສະມາຊິກ​ແມ່ຍິງ​ໄດ້​ຮ່ຳຮຽນ ​ແລະ​ເຊື່ອມ​ຊຶມ​ມະຕິ​ຄຳ​ສັ່ງ ຂອງ​ຄະນະ​ພັກ​ໃນ​ຂັ້ນ​ຕ່າງໆ, ວຽກ​ງານ​ປັບປຸງ​ການຈັດ​ຕັ້ງ, ກໍ່ສ້າງ​ພະນັກງານ ​ແລະ ນະ​ໂຍບາຍ​ໄດ້​ເອົາ​ໃຈ​ໃສ່​ປັບປຸງ​ແບບ​ແຜນ​ວິທີ​ເຮັດ​ວຽກຂອງ​ຮາກ​ຖານ​ຢ່າງ​ຕັ້ງໜ້າ, ​ວຽກ​ງານ​ປົກ​ປ້ອງ​ສິດຜົນປະ​ໂຫຍ​ດ​ແມ່ຍິງ ​ແລະ ​ເດັກນ້ອຍ​ແມ່ນ​ໄດ້​ເອົາ​ໃຈ​ໃສ່​ສຶກສາ​ອົບຮົມ​ລ້ຽງ​ດູ​ລູກ​ຫຼານ​ຂອງ​ຕົນ​ໃຫ້​ໄດ້​ເຂົ້າ​ຮ່ຳຮຽນ​ເມື່ອ​ຮອດ​ເກນ​ອາຍຸ, ຈາກ​ນັ້ນ​ກໍ່ຍັງ​ໄດ້​ຮັບ​ນະ​ໂຍບາຍ​ພັກຜ່ອນ​ໃນ​ເວລາ​ເຈັບ​ເປັນ, ປະສູດ​ລູກ ​ແລະ ​ໄດ້​ຮັບ​ການ​ເລື່ອນ​ຊັ້ນ​ຂັ້ນ​ເງິນ​ເດືອນ​ປົກກະຕິ​ຕາມ​ລະບຽບ​ລັດຖະກອນ, ວຽກ​ງານ​ພັດທະນາ​ຊີວິດ​ການ​ເປັນ​ຢູ່​ຂອງ​ແມ່ຍິງ ​ແລະ ຄອບຄົວ​ເພື່ອ​​ແກ້​ໄຂ​ຄວາມທຸກ​ຍາກ ​ໂດຍ​ປະຕິບັດ​ຕາມ​ແນວທາງ​ຂອງ​ພັກ​ໃນ​ການ​ຍົກ​ສູງ​ນ້ຳ​ໃຈ​ກຸ້ມ​ຕົນ​ເອງ ​ແລະ ສ້າງ​ຄວາມ​ເຂັ້ມ​ແຂງ​ດ້ວຍ​ຕົນ​ເອງ​ເທື່ອ​ລະ​ກ້າວ, ສະມາຊິກ​ແມ່ຍິງ​​ໄດ້​ສ້າງເສດຖະກິດຄອບຄົວເພີ່ມພູນຜົນຜະລິດຫາລາຍໄດ້ເຂົ້າຄອບຄົວ ແລະ ພ້ອມກັນສ້າງຕັ້ງກອງທຶນເຂົ້າໃນຄັງແມ່ຍິງໃຫ້ຫຼາຍຂຶ້ນເພື່ອພັດທະນາ ແກ້ໄຂຊີວິດການເປັນຢູ່ຂອງສະມາຊິກເອື້ອຍນ້ອງແມ່ຍິງໃຫ້ດີຂຶ້ນ.

           DSC 0985 ທ່ານຍັງໄດ້ກ່າວຕື່ມອີກວ່າ: ສຳລັບທິດທາງ ປະຕິບັດຂໍ້ແຂ່ງຂັນ 3 ດີ ປະຈຳປີ 2019 ແມ່ນ ແມ່ນແນ່ໃສ່ສຶກສາອົບຮົມການເມືອງແນວຄິດໃຫ້ເອື້ອຍນ້ອງແມ່ຍິງພາຍໃນໜ່ວຍໃຫ້ມີຄວາມໜັກແໜ້ນຕໍ່ນະໂຍບາຍຂອງພັກ-ລັດ, ມີນ້ຳໃຈຮັກຊາດອັນສູງສົ່ງ, ມີສະຕິລະວັງຕົວເຄົາລົບກົດໜາຍ, ມີຄວາມຮັບຜິດຊອບຕໍ່ໜ້າທີ່ການເມືອງທີ່ໄດ້ຮັບມອບໜາຍມູນເຊື້ອວັດທະນະທຳອັນດີງາມຂອງຊາດ, ສາມາດພັດທະນາຕົນເອງ, ພັດທະນາຄອບຄົວ, ພັດທະນາການຈັດຕັ້ງ, ມີແບບແຜນການດໍາລົງຊີວິປອດໃສຂາວສະອາດ, ເພີ່ມທະວີຄວາມສາມັັກຄີເປັນເອກະພາບພາຍໃນໜູ່ຄະນະ ແລະ ເອື້ອຍນ້ອງແມ່ຍິງ, ຊຸກຍູ້ສົ່ງເສີມຄວາມສະເໜີພາບລະຫວ່າງຍິງ-ຊາຍ ແລະ ການພັດທະນາຄອບຄົວ, ເຜີຍແຜ່ເນື້ອໃນຂໍ້ແຂ່ງຂັນ 3 ດີໃຫ້ເປັນຂະບວນການ.

            ຈາກ​ນັ້ນ​ໃນ​ພິທີກໍ່ຍັງ​ໄດ້​ຮັບ​ຟັງ​ການ​ໂອ້​ລົມ​ຈາກ​ທ່ານ​ ນາງ ດວງ​ມາລາ ສີ​ສະໜຸດ ຮອງ​ປະທານ​ສະຫະພັນ​ແມ່ຍິງ​ແຂວງ ​ເຊິ່ງທ່ານ​ກໍ່​ໄດ້​ສະ​ແດງ​ຄວາມ​ຍ້ອງຍໍ​ຊົມ​ເຊີຍ​ຕໍ​ຜົນງານ​ຂອງ​ເອື້ອຍ​ນ້ອງ​ແມ່ຍິງ​ທີ່​ສາມາດ​ຍາດ​ມາ​ໄດ້ ​ແລະ ​ໃຫ້​ສືບ​ຕໍ່​ຈັດ​ຕັ້ງ​ປະຕິບັດ​ວຽກງານ 3 ດີ​ຂອງ​ແມ່ຍິງ​ໃຫ້​ປະກົດ​ຜົນ​ເປັນ​ຈິງ ພ້ອມທັງມອບໃບຍ້ອງຍໍບຸກຄົນ 3 ດີ ປະເພດ 1 ແລະ ໃບຍ້ອງຍໍຮາກຖານ 3 ດີ ເພື່ອເປັນການຢັ້ງຢືນເຖິງຜົນສຳເລັດໃນການຈັດຕັ້ງປະຕິບັດ.

ຂ່າວໂດຍ: ແຫຼງຄຳ ບຸດນາໂຄກ

ອັບໂຫຼດຂ່າວໂດຍ: ໂອເລ້ ສິງຂາວເພັດ